爽 4月30日 星期一 
一連兩天嘅祖國旅遊就此結束了,雖然真係好唔捨得,但係今次嘅行程勝在夠盡興,所以咩都補番哂,而且今日又係出糧日,所以心情確係唔同...確係唔同! 玩過咩就唔多講喇,因為講到出年都講唔哂(好誇呀),所以只係交代好好玩就算喇,除左玩得盡興之外,食得高興都係好值得一提,能夠食得到富有家鄉風味嘅小菜,認真一絕也......再加上主人家熱情嘅招待,又搵到老朋友一齊有傾有講,人生同樣一樂也~
後記: 幼年時什麼都不懂，讀大學時自以為什麼都懂，畢業後才知道什麼都不懂。到了中年，又以為什麼都懂，到了晚年，才知道什麼都不懂。

天晴 4月27日 星期五
一個完完整整嘅太陽終於都走出嚟,連帶我嘅心情都好好,可惜美中不足嘅地方都係58X巴士嘅冷氣太勁,日日都起哂雞皮咁,坐埋聽日就可以抖抖喇,三日半嘅假期雖然仲未有著落,但係我通常都係殺到埋身先食,到時先再算啦! 尋晚唔知做咩鬼嘢,同個舊同學用MSN傾計,一直係咁講唔停,最後拖到成零晨三點先瞓,諗番都唔知自己講過咩,不過大致上都係講感情事,我嘅上半生只係談過一次戀愛,其實我對感情事唔太了解,或許發生响我身上嘅事比多別人多都唔出奇,我自認自己不太成熟,還有點天真,對社會嘅事唔太上心,之不過每個人都缺點,包括我在內也有許多許多~
後記: 有七樣東西可以毀滅我們：
沒有道德觀念的政治，
沒有責任感的享樂，
不勞而獲的財富，
沒有是非觀念的知識，
不道德的生意，
沒有人性的科學，
沒有人性的崇拜。
甘地

風雲變 4月26日 星期四
晚上係我最輕鬆嘅時間,日頭起身趕返工唔慢得,返到公司雖然可以將節奏放慢,但係不能夠過於放鬆,我只能夠每做兩三個鐘頭,先至可以走出公司行個圈,如果有要事在身的話,可能整個上午或下午都冇得休息,我嘅工作就係咁樣,記起咩要做就要做咩,多兩個腦都唔夠用......所以一到夜晚收工就會完全放鬆自己,我公司樓下冇幾遠就係巴士站,但係我會選擇行前一個站先上車,我每晚就係利用呢十分鐘步行時間,盡量輕輕鬆鬆慢慢走,換來開開心心回家去~
後記: 在現實生活中，我們划的龍舟，其他人的成敗得失，都與我們命運休戚相關；若不對他人施以援手，或作適當調節，終會造成連鎖反應，禍及全體。

平伏 4月25日 星期三
我向來都好鍾意玩,"玩"呢一個詞好多解釋同意義,而且包括好多好多嘅事,仲可以細分為好與壞,有好嘅玩同有壞嘅玩,我曾經睇過政府禁毒嘅宣傳片,佢地一般都會用一個"玩"字嚟帶出主題,呢一個玩就係壞嘅玩,其實對大家嚟講好矛盾,有個小朋友講過:「政府都話玩毒品啦,咁點解我唔玩得呢?」聽完呢番話之後我一直反思,到底食毒品嘅人係咪都只係抱住玩嘅心態呢? 壞嘅玩...玩完之後就一定得出壞結果,而好嘅玩又係咪一定會有好結果呢~
後記: 人類語言豐富多彩，但大半空洞虛妄。動物語言有限，但真實有用。一句真言好過萬句假話。

---

有雨 4月24日 星期二
上個禮拜六寫左張請假紙,第一時間放响大老闆枱頭,最後大老闆冇返到公司,而二老闆又要三陪美國鬼佬......等到星期一終於都批假喇,月頭有五日假期我一日都冇放到,終於都等到月尾補番數,雖然代價係一日年假,不過月頭嘅努力一D都冇白廢到,連續五日嘅加班錢加飯錢,只要等埋月尾出糧,咁就肥過肥仔水喇! 月尾連放三日半假,都唔知去邊度玩好,其他朋友未必肯陪我一齊請大假去玩,分分鐘可能要留返响屋企咬庶都唔出奇~
後記: 頭腦要如倉庫，能藏而不亂；心境要如牆壁，有用而不動。

狂風雨 4月23日 星期一
天氣改變得好誇張嘅一日,又嚟報告一吓天氣先,朝頭早陰氣好沉重,個太陽又比烏雲阻擋住,但係開電視又話今日廿六至廿七度喎,加上天陰陰咁,我廢事病所以都係帶番件風褸,巴士上嘅冷氣冇想像中咁凍,可惜點都逃唔過塞車嘅命運,臨到美孚之際,前面有架68X死火,而我坐緊架58X剛好都係去旺角,個司機懶係醒目咁停車,事後發覺冇乘客上車喎,原來剛好後面有架"真‧68X",三架巴士成一直線咁停低哂,大家可想而知夾响正中間嘅巴士係無法駛出,前面架巴士死火唔行得,而後面架巴士就上緊客,唯有等到後面駛走先再開車啦,一共浪費全車人十五分鐘之多~
後記: 沒有親近過泥土的孩子，永遠不知道什麼是「童年」。~杏林子~

悶熱 4月22日 星期日
終於組到團齊齊上大陸玩番晚喇,一等再等都值得嘅,雖然總人頭只得四個,但係總好過零人頭啦! 其實今次返大陸係另有目的,原來Connie姐已經辭左職,真係勁恭喜佢呀,我以前間死人舊公司出哂名拖糧,仲衰到係連自己伙計都拖,搞到全間公司係...負...士氣,我就好好彩年半前一早辭職走人,起初都替其他同事們擔心,後來又冇咩特別事發生,直到我離開兩個多月之後,阿Lee哥就同老闆辭工唔Do,再過多一年之後終於輪到佳仔哥喇,前排我都出去同佢地食飯慶祝,又再過多幾個月之後就輪到Connie姐喇......大家可想而知一間公司裡面,兩年之間一共有四個老臣子辭職,分別有設計師,工程師,Q.S.同會計,而且仲要唔請新人加入喎,間公司點樣做得住呀~
後記: 仔細聽人說話，是表示尊敬與關心。善言，能贏得聽眾。善聽，才嬴得朋友。

穀雨 4月20日 星期五
好火滾...好鬼火滾呀! 今次並唔係其他人令我火滾,而是冷氣...巴士上嘅冷氣呀,其實早响一年之前我已經好想投訴九巴,我平時坐開嘅58X巴士,架架車都鬼死咁凍,冬天都還好,起碼佢地都會將巴士嘅溫度提升,而且我仲著住大褸呢,不過一到夏天就唔同講法喇,巴士上嘅冷氣有咁凍得咁凍,真係玩殘我......唔通要我大熱天時帶住件大褸先出街咩,而最最最PK就係我返工只係可以搭58X,搭其他交通工具一定死得,浪費時間同金錢不在話下,再過多一排必定凍出病來~
後記: 說謊者所受的懲罰不是不能取信於人，而是他無人可信。

涼天 4月19日 星期四
連續咁玩完FF7&FF8之後,我竟然仲有心情去玩FF9,真係超級遊戲機迷先做得到,我唔怕認架,因為我正正係game迷一名,不過其實我嘅投入感不太足,時下青少年最潮嘅玩意非PSP&NDS莫屬,可惜我一部都仲未有,起初出PSP嘅時候,我已經計劃買返部玩玩,之但係心有異心想買部NDS,到最後內心鬥爭一段好長嘅時間之後......我作出一個連自己都唔相信嘅決定,就係忍手唔買,我咁做並唔係為慳錢,而係暫時冇必要買機而已~
後記: 一籌莫展的時候，最好去看石匠敲打石塊。也許他已經打擊了幾十次仍不見裂縫，可是就在第一百下的時候，石塊裂開了。我們知道，那絕不是最後一擊才成功的，而是前面九十九次所奠下基礎。成功靠努力而致，不靠希望。

涼完再熱 4月18日 星期三
每次做嘢做到悶悶地,即係冇心機工作啦,我都會靜靜雞打機過吓手癮,打機最容易打發最悶嘅時間,因為本身勁鍾意玩,所以一玩就完全咁投入遊戲世界裡頭,前一排開始玩返FF7,話哂都係PS經典中嘅經典,雖然我已經爆過幾次機,但係响公司偷雞咁玩,都係第一次......哈哈,一不離二,爆完FF7之後當然就係FF8啦,又一PS時代嘅經典之作,可謂百玩不厭,我足足用左一個月時間去慢慢咁玩隻game,之前玩有好多隱藏嘅嘢,今次一次起清,正正正是也,二不離三,聽日開始FF9之旅喇~
後記: 陳老師對一個學生說：「請用『難過』一辭，造一簡單、通順而有意義的句子。」
學生應道：「馬路上，車輛多，很難過。」